Portrait.

Dia Schwoba-Rebella und wia's dazua komma isch ...

Am Schmotziga Dauschtig, Anno 2003 bei da Stroßafasnet en Horb send vier domols no aktive Guggamusiker zo dera Meinung komma, daß mer eigentlich so a schtressige Guggamusikerfasnet gar nemme so wellat. Also hend mar kurzerhand beschlossa endlich noch scho einige Jährla mit deara Hektig uffzuhera ond ebbes gmiatlichers a zu fanga. Do jeder vo ons scho johrelang Musik macht ond mer sich onder Musiker halt kennt, war des net schwer no a bar weitere Intressenta für onser Vorhaba zo mobilisiera. Also glei noch dr Fasnet send mer also zammaghoggat ond hend mitnander gschwätzt,was mer eigendlich wellat ond was mer onder so ra kleina musikalischa Bsetzong eigentlich vorstella kennat. S`erschde war,es sollat net zviel Musiker sei, also hechschtens zwanzge. Des send mar hoffenlich bald. S`nächschte, es sollat älle vo da Art her zemmabassa. Des deamar. S`wichtigschde, mir stellat koane Weiber ei. Des lassat mer sowieso bleibe. Ond vor allen Dingen,wellat mer net wia a Guggamusik oder a Lombakapell Musik macha es soll vo ällam ebbes sei,daß es au jedem gfalla duat. Ond so isch auser Saund entstanda. Noch einige Proba hend mer feschtgschtellt das mir jo no gar koin Nama hend ond neamerd woiß wia mer ons nenna soll. Also send mer wieder zammagsessa ond hend überlegt ond ons da Kopf agschtrengt wia mer hoißa sollat. Uff oimol sait oiner Schwoba senn mer,ond Rebella send mer au a bissle. Ond deswega nennat mir aus seit deam Tag Schwoba - Rebella Also ihr Leit wenn ihr ons amol irgendwo an da Fasnet begegnet wissat ihr glei daß mir des send, denn mir send luschdig ,fröhlich ond mir machat a Musik was jedes Herz begehrt. Mir hoffat daß ihr jetzt a bissle an Eiblick über aus griagt hend , also lassat euch überrascha... Eure Schwoba - Rebella.

Rebella - Lied Wir machat Musik bis früa am Morga, versaufat oft des ganze Geld. Doch oins behaltet mir , des isch onsre Freiheit , dia nemmt ons koiner uff dera Welt. Weil mir send Rebella vom Schwobaländle. Mir send Rebella stolz ond frei. Mir kennat koi Regel ond koine Gesetze. Mir send Rebella ond königstreu. Mit onsrer Musik kennt ons fascht jeder. Mir kommat rom wias baise Geld. Vo Süda noch Norda , vo Oscht noch Weschta. Mir machat des was ons grad gfellt. Weil mir send Rebella vom Schwobaländle. Mir send Rebella stolz ond frei. Mir kennat koi Regel ond koine Gesetze. Mir send Rebella ond königstreu. Nau reachte Schwoba send Rebella. Nau reachte Schwoba send Königstreu. En onserm Ländle derfat mir fascht ällas. En onserm Württaberg send mir no frei. Weil mir send Rebella vom Schwobaländle. Mir send Rebella stolz ond frei. Mir kennat koi Regel ond koine Gesetze. Mir send Rebella ond königstreu.